تعلم معنا : كيف تشترى التلفزيون المناسب لاحتياجاتك

   رغم التطور التكنولوجى والمعرفى وانتشار اجهزة التابلت واللاب توب والديسك توب والاى باد ... الخ ، إلا ان مشاهدة التلفاز لها مذاق خاص عندنا جميعا ، وكمان ان حاجتنا لتجديد التلفزيون كل فترة ، حيث كانت اجهزة التلفزيون من الاجهزة المعمرة على ايامنا إلا أن الوضع تغير حاليا واصبح جهاز التلفزيون والثلاجة والغسالة والبوتاجاز لم تعد من السلع المعمرة ، ولذا اصبح مشوار شراء التلفزيون المناسب مهمة صعبة على البعض لتعدد وكثرة الاختيارات وظهور مواصفات كتيرة مش مفهومة زي LCD, LED, HD وغيرها . خلافا لذلك مشكلة اختياره كام بوصة وموضة التلفزيون الذكي -smart TV- التى ظهرت مؤخرا .

    وعلى الرغم من ان جيل الشباب قل اعتماده على التلفزيون إلى حد كبير إلا إنه لاغنى عنه في أي بيت. ولانستطيع الانكار إنه الجهاز الذى يجمعنا كبيرا وصغيرا أباء وأبناء ، بنين وبنات لمشاهدة فيلم أومسلسل أو برنامج بدل ما كل واحد يحط وشه في موبايله. وسواء كنت بتشتري جهاز تلفزيون لبيتك أو هدية لعزيز فدعنا نساعدك لاختيار أنسب جهاز لاحتياجاتك وأحسن سعر .

أولا اشترى جهاز كام بوصة 

كام بوصة يعني؟ بص يا سيدى فيه معادلة تقدر تجاوب بيها على السؤال ده والمعادلة كالتالي:

المسافة بين مكان التلفزيون ومكان المتفرج بالبوصة ÷ 1.6= حجم الشاشة

• حجم الشاشة هو ببساطة خط قطرها (diagonal).
• نخلي بالنا واحنا بنقيس إننا نقيس المسافة بين مكان جلوسنا على الكنبة أو الكرسي ومكان الجهاز مع حساب مساحة كافية بين الحيطة والتلفزيون، لما نقسم على 1.6 هيطلع لنا رقم هو أكبر مقاس شاشة مناسب وده للشاشات الرئيسية اللي هتكون في غرفة المعيشة.
• أما لو قسمت على 2.5 هيطلع رقم أصغر مقاس مناسب وده غالبا هيكون مناسب لغرف النوم أو غيرها من الأماكن الثانوية.
• عموما الخبراء اتفقوا على إن كل ما كانت الشاشة أكبر كل ما يكون أحسن لكن لازم تحط في عين الاعتبار أسعار التلفزيونات واللي تقدر تشوفها على .

ثانيا تعرف على مواصفات الجهاز لاختيار مايناسبك

لما تدخل معرض تلفزيونات حتلاقى مع كل تلفزيون بطاقة فيها أرقام كتير أوي صعب تفهم منها حاجة. ولو سألت وفهمت عرفت إن مش كل الأرقام دي مهمة واحنا هنركز على كام رقم بس هما اللي هيساعدوك تشتري الجهاز المناسب. وإليك أهم ارقام البطافة التعريفية لكل جهاز تلفزيون فى الدنيا

1. نسبة البعد الأفقي والبعد الرأسي للشاشة

• هتلاقي نسبة مكتوبة بتبقى 4:3 أو 16:9 ودي نسبة البعد الأفقي للشاشة والبعد الرأسي على الترتيب. والمقاس الأكثر انتشارًا والأفضل هو 16:9 واللي بيكون عرضه أكبر من طوله. وده الأنسب لأنه بيعرض لك كل حاجة في الكادر.
• تلفزيوننا في البيت مثلًا قديم شوية مقاسه 4:3 وشاشته مربعة شوية وعشان كده معظم البرامج على القنوات الجديدة والمسلسلات بتكون شوية مقطومة من الجنب أو الكلام بيكون شكله مش كامل وعشان كده حاول تجيب المقاس الاكبر وهو 16:9.
• فيه مقاس تالت وهو 21:9 وده أكبر بكتير ومش هتحتاجه أوي لو بتشتري جهاز تلفزيون منزلي عادي إلا إذا كنت ناوي على مسرح منزلي.

2. درجة وضوح الصورة

• من أهم الخصائص اللي لازم تاخد بالك منها في التلفزيون هي درجة وضوح الصورة ( Resolution).
• درجة الوضوح هي عدد البيكسلات – Pixels – الموجودة في الشاشة وبتتقاس برقم مضروب في رقم تاني وهو عدد البيكسل أفقيًا ورأسيًا. كل ما زاد العدد ده كل ما زادت درجة وضوح ونقاء الصورة.
• درجات الوضوح الأكثر شيوعًا: HD , Full HD , Ultra HD   تقدر طبعا تقارن بين أسعارها كلها لكن طبعا أغلاهم هو UHD TV. بس النوعين التانيين هيوفوا الغرض.

3. درجة التباين

• رقم تالت مهم على البطاقة التعريفية للجهاز وهي درجة التباين contrast.
• هي قيمة بتوضح الفرق بين أغمق لون على الشاشة وافتح لون.
• غالبًا الرقم اللي على البطاقة مش هيساعدك كتير إنك تحدد التباين الفعلي للشاشة؛ أحسن حل إنك تشوف بعينك حاجة شغالة على الشاشة.
• أغلب المعارض بتكون مشغلة فيديو على الشاشة يعرض لك الألوان،  بس السر اللي ناس كتير متعرفوش هو إن الفيديو ده دايمًا هيعرض لك الشاشة في أحسن حال لأنه معد بشكل يساعد على إظهار جمال الشاشة.
• الحل الأمثل لتحديد درجة التباين: هي إنك تروح المعرض بفلاشة أو اسطوانة بلوراي أو DVD لفيلمك المفضل اللي حافظه وعارف مشاهده كويس وتطلب إنك تشغله على الجهاز وحاول تتنقل بين المشاهد المختلفة الإضاءة وتشوف كمان مشهد يكون ضلمة نسبيًا ووقتها تحدد بنفسك مدى رضاك عن أداء الشاشة.

4. Refresh Rate

• آخر رقم مهم هو رقم الـ refresh rate .
• هو رقم بيوضح مدى تردد الصور السريعة على الشاشة، كل ما زاد كل ما يكون أحسن وهيخلي تجربة مشاهدة المشاهد المتحركة والسريعة ممتعة جدًا.
• في الأغلب الرقم ده بيكون حوالي 60Hz.

ثالثا : خصائص الشاشة والمميزات الاضافية

1. نوع الشاشة ( بالنسبة لتقنية الإضاءة)

• بعيدا عن الأرقام هتلاقي اختصارات زي LED, OLED وغيرها.. ودي يا سيدي كلها أسماء لتكنولوجيا إضاءة الشاشة وبدون تفاصيل طويلة ومملة الاتنين كويسين.
• ولو إن الـ LED هو الأكثر تطورًا أما الأحسن فهو LED , LCD وفيه كمان أحدث OLED لكن طبعا كله بتمنه وكل ما كانت التكنولوجيا أحسن كل ما زاد السعر.
• شاشة LCD , LED هي شاشات مسطحة تعتمد على الاضاءة الخلفية التي تنبعث من خلفية الشاشة .
• شاشة OLED   تستخدم طاقة أقل من الأنواع الأخرى وهي بشكل عام أنحف بكثير عن شاشات LED، تعتمد على صمامات ثنائية من الكربون العضوي ينبعث منها الضوء بدرجة كبيرة، لذلك تجد هذا النوع من الشاشات يقدم عرض ذا ألوان واضحة جدًا ودرجة سطوع عالية مع جودة ممتازة.

2. الوصلات

• وأنت بتدور على جهاز تلفزيون متغفلش عن وصلاته.
• دلوقتي كل التلفزيونات شغالة بوصلات HDMI وكل ما زاد عدد الوصلات كل ما كان أحسن.
• وكمان راعي إن يكون التلفزيون فيه وصلات USB، وبكدا تقدر تحط فلاشة عليها أفلامك أو صورك وتعرضها على الشاشة بسهولة.

3. جهاز التحكم عن بعد

• ركز كمان في الريموت كنترول.
• حاول تشتري جهاز تقدر تتعامل معاه بأي ريموت كنترول عادي عشان لو الريموت الأصلي باظ أو ضاع تقدر توفر له بديل بسهولة.
• كمان شوف نوع بطارياته ومدى توافرها بالنسبة لك.

4. تلفزيونات ثلاثية الأبعاد

• اذا دورت حتلاقى فى السوق تليفزيونات ثلاثية الابعاد كتيرة ، ودي بتشوف عليها الأفلام الثلاثية الأبعاد زي ما تكون في السينما.
• والانواع دى مش عملية أوي لأنك هتحتاج نظارات ثلاثية الابعاد بعدد أفراد أسرتك، كمان تخلي بالك إن مش كل النضارات بتشتغل مع كل الأجهزة.
• لكن في أجهزة بيجي معاها نضارات ثلاثية الأبعاد زي LG.
• التلفزيونات ثلاثية الأبعاد بتكون ممتعة جدًا خصوصًا للأطفال.
• ممكن تشتري أفلام ثلاثية الأبعاد وتتفرجوا عليها في البيت زي السينما بالظبط.
• خلى بالك برضه أن مفيش قنوات كتيرة عندنا في مصر بتعرض الحاجات بخاصية ثلاثية الأبعاد.

5. الشاشات المنحنية

• من الحاجات اللي ممكن تستغرب لها وظهرت فى السوق مؤخرا الشاشات المنحنية او CURVED TV واللي تقريبًا مش جايبة اضافة غير الشكل المختلف.
• الشكل المنحني ده في الغالب عيب أكتر منه ميزة؛ لأنه بيخلي الصورة مش واضحة بالكامل إلا اذا كنت قاعد قصاد الشاشة بالظبط – متسنتر- وبالتالي بيقيد مكان جلوسك وراحتك.

6. السماعات

• بالنسبة لسماعات الجهاز عشان تبقى مطمن جربها قبل الشراء في المحل وتشوف مدى رضاك.
• للأسف في السنوات الأخيرة الشاشات بقت أرفع آه لكن ده جه على حساب الصوت بشكل كبير.
• إن كنت من محبى الاصوات المجسمة ومدمنى سماع الاغانى والمهرجانات يبقى لازم تركز على خصائص الصوت فى التلفزيون قبل ما تشتريه علشان ماتندمش بعد الشراء .
• عمومًا مسألة الصوت نسبية، في أشخاص زى حالاتى مش بيحبوا الصوت العالي! .

7. التلفزيون الذكي

• وأخيرًا لو كنت محتار تشتري SMART TV  ولا لأ! احنا هنوفر عليك الحيرة لما نعرفك إن تقريباً كل الأجهزة في السوق ذكية.
• باختصار الجهاز الذكي هو اللي فيه مميزات موجودة في تليفونك الذكي زي مثلا الاتصال بالإنترنت وتصفح المواقع واستخدام خدمات زي Netflix.

الخلاصة وشوية نصايح أخيرة

• فيه ملاحظة تانية مهمة في شراء التلفزيون وهي إنك في الغالب لما تشتريه وترجع البيت وتشغله ممكن تلاقي إن الصورة مش زي ما كانت ظاهرة في المحل وهتحس إنه اتضحك عليك، لكن اطمن وماتقلقش والمشكلة مش في الجهاز لكن في طريقة العرض.. المحلات بتحط أجهزة التلفزيون بشكل يخلي الصورة شكلها أحسن بكتير من أي مكان تاني، كمان بيعرضوا عليه أفلام و فيديوهات جودتها عالية وألوانها مشرقة وده لجذب الزبون.
• حاول وأنت بتشتري الجهاز تكون شاشته مش لامعة – matte- وده مهم جدًا خصوصًا لو كان في الغرفة اللي فيها الجهاز موجود شباك أو مصدر اضاءة قوي واللي غالبًا هينعكس على الشاشة وهيعمل ضي مش هتحبه وهيزعجك وأنت بتتفرج. فتقدر تتجنب المشكلة دي لو شاشتك matte.
• وأنت بتشتري الجهاز لف حواليه وشوف الصورة من زوايا مختلفة؛ عشان الشاشات الحديثة كلها بيختلف فيها جودة الرؤية باختلاف زاوية الرؤية فحاول تجيب أحسن واحد.
• عشان أكيد مش كل أفراد الأسرة هيقعدوا في نص الشاشة فحاولوا تلاقوا الشاشة اللي بتتميز بزوايا رؤية كويسة.

وأخيرًا بعد ما تعاين الجهاز اللي يعجبك ارجع بيتك زي الباشا وقارن أسعار الجهاز اللي يعجبك من خلال الانترنت واشترى من متجر او محل بيوصل الاجهزة لحد بيتك علشان تضمن ان الجهاز مايتكسرش منك وانت بتنقله للبيت وفى نفس الوقت مش حتحمل هم أنك هتشيل التلفزيون لحد البيت وتبقى خايف يتكسر منك في الطريق.

والف مبروك مقدما