يتساءل الكثير منا عن الفائدة التى تعود على البنك والبائع لسلعة ما عن طريق كارت الائتمان وهذا هو مايدفعنا لسؤال اليوم - واسمحو لى ببعض العامية - وهو
ايه هي الماستر و الفيزا ؟؟؟؟
نسبه كبيره من الناس اللي ليهم تعامل مع البنوك او عندها الماستر او الفيزا في مصر لو سألتهم السؤال ده هتنحصر فكرتهم انها بطاقات ممكن تسحب فلوس منهم على المكشوف لو اتزنقت بس كتير بيسحب بيها نقدي و شويه بيسحبوا و يشتروا و قليل اللي بيشتري بس بيها و حجتهم في كده انها مبيتحسبش فيها اي فائده للسحب النقدي .
الماستر هي بديل النقود فكرتها اساسا لعدم حمل النقود و ممكن تعتمد على جزئية مهمة جدا عند الشخص نفسيا ممكن تحس انك اشتريت سلعه من غير ما تدفع ثمنها في الوقت الحالي فكره الماستر العامة انك بتشتري احتياجاتك في الشهر عادي جدا و في اخر الشهر يجي كشف الحساب بفترة سماح و بعدين تسدد في الفترة دي بدون اي فائدة و لو سددت بعديها تبدأ الفوايد بس محدش سأل نفسه ايه فايده البنك في العمليه الصغيره دي ؟
انت اشتريت و قعدت فتره ممكن توصل ل 55 يوم و بعدين سددت و متحسبش عليك فوائد و كمان البنك دفع من جيبه تمن طباعه كشف الحساب اكيد البنك ليه فايده خصوصا انك لو سحبت كاش تبدأ الفوائد من 20 جنيه عموله سحب كاش و معدل ثابت للفوائد شهريا مع ان الحالتين هو دين عليك للبنك .
عشان نعرف فايده البنك لازم نعرف الفايده اللي بياخدها الخمس أطراف الداخلين في العمليه دي ( المشتري اللي هو انت - البائع - البنك مصدر البطاقه - البنك واضع الماكينه في المحل - شركه ماستر او فيزا ) .
طبعا انت فايدتك باينه جدا انت بتشتري سلعه في وقت معاكش فيه فلوس و تسدد حين ميسرة بدون فوائد او ربا
فايدة المحل انه باع سلعة كان ممكن ميبعهاش لمده شهر في حالة انك معاكش فلوس و عشان الميزة دي اللي خدها المحل ان بضاعته اتباعت النهارده مش بكره لازم هيدفع تمن الميزة دي و التمن هو 3% من ثمن البضاعه بمعنى انك لو اشتريت سلعه ب 100 جنيه هتتخصم من البطاقه 100 و هي بتتباع كاش ب 100 بس
وبالنسبة للبنك البنك هيدي المحل 97 عشان اشتراها النهارده مش بعد شهر اما عن ال 3 % الي اتخصموا دول او ال 3 جنيه في المثال اللي فوق تتقسم جنيه للبنك مصدر البطاقه جنيه للبنك واضع الماكينه في المحل في الغالب من الاربعه الكبار ( الاهلي - مصر - القاهره - الاسكندرية )و جنيه لشركه ماستر او فيزا ( مش عارف ليه بحس ان شركه ماستر عامله زي مسرحيه الزعيم لما كان بياخد قرش على كل قزازه كازوزه تتفتح هيا بتاخد 1 % عن اي عمليه شراء تحصل في جميع انحاء العالم بالماستر )
طبعا لما سعادتك بتسحب نقدي مفيش اي عموله للتلاته دول عشان كده لازم البنك ياخد فايدته و عشان كده هي بتكون فايده كبيره غالبا .
للحصول على اقصى استفادة من كارت الائتمان
احسن فتره شراء اللي بتاخد فيها اعلى فتره سماح هي اليوم التاني ليوم صدور كشف الحساب
مثلا لو كشف الحساب بينزل 30 في الشهر يبقى احسن يوم تشتري فيه يوم 1 من الشهر التالى ساعتها عمليه الشراء تنزل في كشف الحساب 30 يوم + 25 يوم سماح بعد صدور كشف الحساب يببقى 55 يوم
تحذير هام
في محلات ظريفه جدا تحب تحملك انت ال 3 % اول ما تقوله انا هدفع بالماستر في البعض يقولك الماكينه بايظة و لما يتأكد انك مش هتدفع ياخد الماستر يجرب و بالصدفه تشتغل .
و في نوعية يقولك لو هتدفع بالبطاقة يبقى السعر كذا فحضرتك ترفض المبلغ الزيادة وطبعا في الحاله دي زعق و ميهمكش انت الصح مش من حقه يزود و لو هاجمته و قلت هتبلغ هيبيع لأنك لو بلغت هتتشال الماكينة و في احيانا يرفضون بيع سلع بعينها بالماستر فحضرتك رد عليه ببساطه قل له يعني انت ممتنع عن بيع سلعة عندك بالبطاقة فأبلغه انك ممكن ببساطه تبلغ البنك وفى الحالة دى حيبيع لك على طول بالبطاقه محنا برضه شعب ميجيش الا بالعين الحمر
اتمنى ان يكون الموضوع مفيدا لكم وتابعونا فى باقى الموضوع
غدا وسيكون عن
سرقة بطاقات الائتمان وكيفية تجنبها
TAREK ELGIZAWY
ولكم خالص تحياتي
أخوكم طارق الجيزاوي
الإسكندرية في الأربعاء 18 فبراير 2009
ليست هناك تعليقات:
إرسال تعليق